అన్యోన్య దాంపత్యానికి అమల సాధనాలు

అన్యోన్య దాంపత్యానికి అమల సాధనాలు ఆయన మీకోసం మీజాతి నుండే జీవిత భాగస్వాము(స్త్రీ)లను సృజించాడు, వారి దగ్గర మీరు సౌఖ్యం పొందడానికి. ఇంకా ఆయన మీ మధ్య ప్రేమానురాగాలు, దయా దాక్షిణ్యాలను కూడా జనింపజేశాడు. ఇది కూడా ఆయన సూచనల్లోనిదే. యోచించే వారికి ఇందులో అనేక నిదర్శనాలున్నాయి. (21) వేర్వేరు కుటుంబాల నుంచి వచ్చిన ఇద్దరు వివాహ బంధంలోకి అడుగుపెడతారు. సంస్కృతి, సంప్రదాయాలు, అలవాట్లు భిన్నంగా ఉండే ఆ ఇరువురూ ఒకటై సుఖసంతోషాలతో జీవించాలంటే కొన్ని సూత్రాలు పాటించాలి. పనులను పంచుకుంటూ ప్రేమను పెంచుకోవాలి ఇంటి బాధ్యతలను పంచుకున్నట్లే ఇంటి పనులు కూడా నువ్వూ నేను సగం సగం అనుకుంటూ పూర్తి చేయాలి. మగవాడిని నేనెందుకు చేయాలి లేదా నాకు చేయడం రాదు అని తప్పించుకో కూడదు. చిన్నప్పుడు నేనీ పనులు నేర్చుకోలేదు అంటూ అమ్మాయిలు బద్దకించడానికి ప్రయత్నించకూడదు. ఇలా చేస్తే తమకు ఎదుటివారి చేయూత లేదు, మొత్తం పనంతా నాపైనే అనే భావన ఇవతలి వారికి కలిగే ప్రమాదం ఉంది. అలాకాకుండా ఇంట్లో సమానత్వానికి పెద్ద పీట వేయాలి. చిన్న పనిని కూడా పంచుకుంటూ చేస్తే చాలు. ఒకరిపై మరొకరికి మర్యాద, గౌరవం, ప్రేమ పెరిగి, ఇరువురి అనుబంధాన్ని మరింత పెంచుతాయి. ఓ కవి అన్నట్టు - ఆడుతు పాడుతు పనిచేస్తుంటే అలుపు సొలుపేమున్నది ఇద్దరుమొకటై చేయికలిపితే ఎదురేమున్నది మనకు కొదవేమున్నది.

ఓ సారి హజ్రత్ ఆయిషా (ర.అ)ను ప్రవక్త (స) వారిని గురించి ప్రశ్నించగా, ఆమె ఇలా వివరించారు: “ఆయన ఇంటి పనుల్లో 3 నిమగ్నులై ఉండేవారు. తన స్వహస్తాలతో చినిగిన దుస్తులకు అతుకులు వేసేవారు. ఇల్లు ఊడ్చేవారు. పాలు పితికేవారు. బజారు నుంచి సరకులు కొనుక్కువచ్చేవారు. చెప్పులు తెగితే స్వయంగా కుట్టుకునేవారు, నీరు తోడే బొక్కెనకు మరమ్మత్తు చేసేవారు. ఒంటెను తానే కట్టేసేవారు, దానికి మేత వేసేవారు. సేవకునితో కలసి పిండి కలిపేవారు". (సహీహ్ బుఖారీ) ఇంటి పెద్దలను గౌరవించాలి. తల్లిదండ్రులను.. ఇరువైపులా పెద్దలను భార్యాభర్తలిద్దరూ అభిమానించాలి. తమ వారిని బాగా చూసుకుంటూ ఎదుటివారి తల్లిదండ్రులను పట్టించుకోకుండా ఉండకూడదు. ఇలా చేస్తే అవతలివారు నొచ్చుకుంటారు. ఒక్కోసారి వారు వెంటనే దాన్ని పైకి చెప్పలేకపోవచ్చు. కానీ ప్రేమ క్రమేపీ తగ్గిపోయే అవకాశం ఉంది. దాని ఫలితంగా పరస్పరం ఆసక్తి క్రమేపీ తగ్గుతుంది. నిజమైన ప్రేమ లేని చోట బంధం బలహీనపడుతుంది. ఇది మరిన్ని దుష్పరిణామాలకు దారి తీస్తుంది. అలా కాకుండా ఇరువురూ జీవిత భాగస్వామి అమ్మా నాన్నలను కూడా సొంత వారిలానే ప్రేమించగలిగితే సమస్యలకు తావుండదు. ఎక్కడైనా, ఎప్పుడైనా పెద్దవాళ్లను గౌరవిస్తూ, వారి సలహాలు, సూచనలు తీసుకుంటూ ఉంటే వారి అనుభవాలే మనకు చక్కటి మార్గదర్శకత్వాన్ని అందిస్తాయి. ఈ రోజు భార్యాభర్తలు - వారి వారి అత్తామామల్ని, వారి వారి ఆప్తుల్ని, సంబంధీకుల్ని గౌరవిస్తే, రేపు వారికి వారిని గౌరవించే అల్లుళ్లు, కోడళ్ళు వస్తారు. మన ఇళ్లల్లో పని చేసేవారు కూడా కొన్ని సమయాల్లో పెద్దవారి ఉంటారు - వారిని సైతం గౌరవించాలి. మీరు అల్లాహ్‌నే ఆరాధించండి. ఆయనకు (దైవత్వంలో) ఎవరినీ సాటి కల్పించకండి. తల్లిదండ్రుల పట్ల సద్వర్తనంతో వ్యవహరించండి. బంధువులు, అనాథలు, నిరుపేదలతో మంచిగా మసలుకోండి. ఇరుగుపొరుగు బంధువులకు, పరిచయంలేని పొరుగువారికి, (మీ దైనందిన కార్యకలాపాలలో) తారసపడే మిత్రులకు, బాటసారులకు, మీ అధీనంలో వున్న బానిసలకు మేలు చేయండి. అల్లాహ్ అహంకారుల్ని, ప్రగల్భాలు పలికేవారిని ఎన్నటికీ ప్రేమించడు. (అన్-నిసా: 36) పరస్పరం దర్పణాలు దంపతులు ''ఒక విశ్వాసి మరో విశ్వాసి కోసం దర్పణం - అద్దం వంటి వాడు" అన్నారు ప్రవక్త (స). (అబూ దావూద్) అన్యోన్యత లేని చోట అనురాగం ఉండదు. అనురాగం లేని చోట ఆనందం అసలే ఉండదు. ‘దర్పణం’ అంటే.. అద్దం! అద్దంలో మన ప్రతిబింబం ఏ రీతిలో కనబడుతుందో, మనని మనం స్పష్టంగా ఎలా చూడగలమో, ఎలా చూస్తామో అలాగే దాంపత్య దర్పణంలో ఇతరులు కూడా స్పష్టంగానూ భార్యాభర్తల జీవితాలను, నడవడికను, వారి అన్యోన్యతను లేదా వారి కయ్యాలను, ప్రవర్తనలనుఅంటే స్పష్టంగా చూడగలుగుతారు. అడ్డం అబద్ధమాడదు, అన్యోన్య దాపత్యంలోనూ అబద్దాలు తావివ్వకూడదు. అద్దం మన రూపాన్నే, మనలోని అందాన్ని, వికారాన్ని మాత్రమే చూపుతుంది. కాబట్టి పరోక్ష నిందాఁకి పాల్పడకూడదు. అద్దం ముందున్నది మాత్రమే చొప్పిస్తోంది. కాబట్టి ఒకరి కూపీలు లాగటం, రంధ్రాన్వేషణ చేయడం మానుకోవాలి. అద్దం అనుమానించాడు, అవమానించదు. కాబట్టి పెనుభూతంగా మారే అనుమానానికి చోటివ్వకూడదు. అద్దం ముందు ఎవరు నిలబడినా, ధనికుడైనా -పేదవారైనా, అత్తయినా - కోడలయినా, మామయినా, అల్లుడయినా, ప్రజలైనా, ప్రముఖులైనా, మనిషైనా - మృగమైనా ఎవరైనా సరే, ఎవరికీ భయపడకుండా, నిర్భయంగా నిజాన్ని వ్యక్త పరురుస్తుంది కాబట్టి ఒక విశ్వాసి అద్దంలాగా మరొక విశ్వాసి పట్ల ధైర్యంగా ఉండాలి. ఏ వ్యక్తిత్వంచేనయినా ప్రభావితం కాకూడదు. భార్యాభర్తలు - ప్రతి ఒక్కరు వారికంటూ ఓ ప్రత్యేకమైన వెన్నుముక వ్యక్తిత్వం ఉండేలా చూసుకోవాలి. అద్దం మనం దాన్ని ఏదైనా అడిగినప్పుడే సమాధానం ఇస్తుంది. అనవసరంగా ఎవరి విషయంలోనూ తల దూర్చదు. భార్యాభర్తలు సయితం ఒండొకరి విషయాల్లో అనవసరంగా జోక్యం చేసుకొని, అతి ఉత్సాహానికి పోయి అనర్థాల్ని కొని తెచ్చుకోకూడదు. భార్యాభర్తల అన్యోన్యతలూ తగవులూ ఎదుటివారికీ, చుట్టూ వున్నవారికి తప్పనిసరిగా టీవీ సీరియల్‌లా, సినిమా రీలుగా కనిపిస్తూనే వుంటాయి. దర్పణంలో మనని మనమే కాక ఇతరులను ఎలా చూస్తామో, ఎలా చూడగలుగుతామో, అలాగే బాహ్య దర్పణం నుండి ఇతరులూ మనల్ని గమనిస్తూనే ఉంటారు. అందుకని దాంపత్యం అనేది మనకు మాత్రమే కాదు, చూపరులకీ ఆనందంగా, ఆదర్శంగా, ఆహ్లాదంగా అగుపించాలి. వింతగా, వెక్కిరించేలా, వెగటు కలిగించేలా అగుపించకూడదు. సర్దుకుపోతేనే సుఖం దాంపత్య జీవితంలో చిటపటలు, చిర్రుబురులు, చిలిపి తగాదాలు, సరససల్లాపాలు, సంసారంలో సరిగమలు లాంటివి ఎన్నో ఆసక్తికరమైన సంగతులుంటాయి. వివాహంతో రెండు శరీరాలు మాత్రమే కాదు, రెండు మనసులు కూడా ఒక్కటవుతాయి. ఎలాంటి కష్టనష్టాలు వచ్చినా, సుఖం దుఃఖం కలిగినా పరస్పర సలహా సంప్రదింపులతో చక్కదిద్దుకోవాలి. ఒకరి అభిప్రాయాలు ఒకరు పంచుకొంటే బంధం బలపడుతుంది. ప్రతిఒక్క విషయం ప్రేమగా చర్చించుకోవాలి. కావాల్సిన సలహాలు, సూచనలు చెబుతూ ఉండాలి. అలాగే స్వీకరించాలి కూడా. అపుడే ఇద్దరిమధ్య ప్రేమ శాశ్వతం అవుతుంది. ఎలాంటి సమస్యలున్నా వాటిని ఎదుర్కొనే శక్తి వస్తుంది. ఇంటి గుట్టును రట్టు చేయకూడదు బయటవారితో... కుటుంబ సమస్య ఏదైనా వచ్చినప్పుడు దాన్ని దంపతులిద్దరే తీర్చుకోవడానికి ప్రయత్నించాలి. బయటి వారితో చర్చించడం లేదా భాగస్వామి గురించి వారివద్ద చెడుగా మాట్లాడటం చేయకూడదు. మూడో వ్యక్తికి అవకాశం ఇస్తే, సమస్య అవతలివారి చేతిలోకి వెళ్లినట్లే. దాని గురించి మనకు అర్థమైనంతగా వారికి అర్థం కాకపోవచ్చు. ఒకసారి మనం అలా చర్చిస్తే, తిరిగి మళ్లీ ఎదురుచూడొచ్చు. ఇది మరో సమస్యను కొనితెచ్చుకున్నట్లే. ఇరువురూ కలిసి చర్చించుకుని సామరస్య పూర్వకంగా పరిష్కరించుకుంటే ఆ సమస్య మళ్లీ తలెత్తక పోవచ్చు. వచ్చినా.. దాన్నెలా తీర్చిదిద్దుకోవాలో అనుభవం నేర్పుతుంది. చివరి మాట సమాజంలో భార్యాభర్తల బంధం అత్యంత పవిత్రమైనది. నిజానికి ఇదే అసలు సృష్టికి మూలం. ఈ బంధం ద్వారానే దైవం మానవజాతిని ఉనికిలోకి తీసుకువచ్చాడు. అందుకే దీనికి ఇంత పవిత్రత, ప్రత్యేకత. ఈ బంధం పటిష్టంగా, గౌరవప్రదంగా ఉంటేనే మానవజాతి విజయపథంలో సాగుతుంది. సమాజ నిర్మాణంలో భార్యాభర్తలిద్దరి పాత్రా కీలకమైనదే. భార్యాభర్తల మధ్య అవగాహన, ప్రేమానుబంధాల ద్వారానే మంచి కుటుంబాలు ఉనికిలోకి వస్తాయి. వారిద్దరి సాంసారిక జీవితం, దాని నియమాలు, బాధ్యతలు సరిగా అవగాహన చేసుకుంటేనే ఉత్తమఫలితాల్ని సాధించడానికి వీలవుతుంది. ఆలుమగల మధ్య ఈ విధమైన అవగాహన, పరస్పర ప్రేమానురాగాలు లోపించడం వల్లనే ఈనాడు కుటుంబాల్లో శాంతి కరవైపోతోంది. కుటుంబ జీవితంలో శాంతి కొరవడితే, అది సత్సమాజ నిర్మాణానికి అవరోధంగా పరిణమిస్తుంది. అందుకని భార్యాభర్తలు ఒకరినొకరు గౌరవించుకోవాలి. ఎవరి పరిధుల్లో వారు తమతమ బాధ్యతల్ని నెరవేర్చాలి. స్వేచ్ఛ పేరుతో స్త్రీలు తమ పరిధుల్ని అతిక్రమించకూడదు. అలాగే పురుషులు భార్యలపై పెత్తనం చలాయించకూడదు. సహధర్మచారిణితో సత్ప్రవర్తనతో కూడిన జీవితం గడపాలి. ఆమె హక్కులను విశాల హృదయంలో గౌరవించాలి. ఎందుకంటే, ‘‘వారితో సత్ప్రవర్తనతో సంసారం చేయండి’’ (నిసా) అని దైవం ప్రబోధించాడు. భార్య పట్ల సౌమనస్యంతో, ప్రేమాభిమానాలతో ప్రవర్తించాలి. ముహమ్మద్ ప్రవక్త ఇలా ప్రవచించారు: ‘‘తమ నడవడికతో అందరికంటే ఉత్తములైనవారే విశ్వాసంలో పరిపూర్ణులు. తమ భార్యల పట్ల అత్యంత మంచిగా మెలిగేవారే అందరిలో మంచి నడవడిక కలవారు’’(తిర్మిజీ). ఒక మనిషి నైతిక ప్రవర్తనను, అతని మంచితనాన్ని గ్రహించడానికి అసలైన గీటురాయి అతడి గృహజీవితమే. స్వేచ్ఛగా ఉండే గృహజీవితంలోనే… మానసిక, నైతిక, ఆర్థిక సంబంధమైన ప్రతి అంశం ముందుకు వస్తుంది. కుటుంబం పట్ల ఔదార్యం, ప్రేమ, దయ కలిగి, కుటుంబానికి మానసిక తృప్తిని, ప్రశాంతతను కలిగిస్తూ ప్రేమాభిమానాలతో ప్రవర్తించినప్పుడే ఒక మనిషి విశ్వాసంలో పరిపూర్ణుడవుతాడు. ప్రతిమనిషిలో ఏదో ఒక బలహీనత ఉంటుంది. స్త్రీలు కూడా ఇందుకు మినహాయింపు కాదు. అందుకని చిన్నచిన్న విషయాలను రాద్ధాంతం చేయకూడదు. భార్యలో ఏదైనా చిన్నాచితకా లోపం, బలహీనత కానవస్తే – దానికే మూతి ముడుచుకోకూడదు. ఓర్పు వహించాలి. ఆమెలోని మరో మంచి గుణాన్ని గుర్తించి ఔదార్యం ప్రదర్శించాలి. చిన్నచిన్న విషయాలకే మనసు పాడుచేసుకుంటే కుటుంబాల్లో దాంపత్య సుఖసంతోషాలు కనుమరుగైపోతాయి. అందుకే ముఖ్యంగా స్త్రీల వ్యక్తిత్వాన్ని గుర్తించాలి. అన్ని విషయాల్లోనూ పరస్పర అవగాహన అత్యంత అవసరం. ఈ విధంగా భార్యాభర్తలు ఒకరి హక్కుల్ని ఒకరు గుర్తించి, గౌరవించుకుంటే దైవం, దైవప్రవక్త హితవుల వెలుగులో జీవితం గడిపితే… ఇహంలో, పరంలో సాఫల్యవంత జీవితం పొందవచ్చు.