దాంపత్య జీవితం - అనుమాన భూతం - Marital life - a ghost of doubt

దాంపత్య జీవితం - అనుమాన భూతం భూమి పైన చాలా అందమైన, స్వచ్ఛమైన బంధాలలో వివాహం ఒక్కటి. ఇది ఇద్దరి ఆత్మల యొక్క సంబంధం, వారు జీవితాంతం ఒకరికొకరు కట్టుబడి ఉంటానని వాగ్దానం చేస్తారు. దాంపత్య జీవితం -అది నమ్మకం అనే బీజంతో ఎదిగే మహా వృక్షం. దాంపత్య జీవితం - అది కేవలం అనుమానం అన్న విష వైరస్‌తో పుటుక్కుమని తెగిపోయే పచ్చి దారం. కాబట్టి ఆలుమగలు తాము, కట్టుకునే అనురాగ గోపురంలో విష వాయువులు ప్రవేశించకుండా జాగ్రత్త పడాలి. ఎందుకంటే రాను రాను అవి పెనుభూతాలుగా మారి ఏకంగా ఇద్దరి జీవితాల్ని మింగేసే ప్రమాదముంది. ఓ బంధం నిలవాలంటే దానికి పునాది నమ్మకమే.. నమ్మకం లేని చోట బంధం ఎన్నాళ్ళో నిలవదు. భార్యాభర్తల మధ్య అన్యోన్నత, అనురాగం మూడు పూలు ఆరు కాయలుగా వర్ధిల్లాలంటే వారు షరీయతు సూచించిన హద్దులను గౌరవిస్తూ ఎవరి పరిమితుల్లో వారుండాలి. ఒకవైపు వేరుగా బ్రతకలేము అని చెబుతూనే భార్య మీద భర్త, భర్త మీద భార్య ఫిర్యాదు చేస్తూ తిరగటం నిరర్థకం, నిర్హేతుకం. ఒకరిలో ఉన్న లోపాలను ఇంకొకరు పెద్ద మనస్సుతో మన్నించాలి. ఏదేని విషయంలో మనిషి తీవ్ర సందిగ్ధానికి లోనైనప్పుడు ఖుర్‌ఆన్‌ వచనాల, ప్రవక్త (స) వారి ప్రవచనాల వెలుగులో పరిష్కారం చూపే పండితులను, వివేచనాపరులను, స్థితప్రజ్ఞులను సంప్రదించటం ఎంతో ఉత్తమం. ఆ మేరకు ఉపయోగపడే దైవ ప్రవక్త (స) వారి రెండు ప్రవచనాలను ఇక్కడ పొందుపరుస్తున్నాము.

ఓ పల్లెటూరి వ్యక్తి దైవ పవ్రక్త (స) వారి సన్నిధికి వచ్చి - ''యా రసూలల్లాహ్‌! నేను తెల్లన, నా భార్య తెల్లన. కాని మాకిద్దరికి పుట్టిన పిల్లాడు నల్లన'' అని భార్య మీద తనకున్న అనుమానాన్ని వ్యక్త పర్చాడు. అది విన్న ఆదర్శ పవ్రక్త (స) ''రెండు ఎరన్రి ఒంటెలకు బూడిద రంగు ఒంటె పుట్టడం నీవు గమనించి ఉంటావు కదా! అది ఎలా సాధ్యం అయ్యిందంటావు?'' అని ఎదురు పశ్న్ర వేశారు. అందుకా వ్యక్తి ''బహుశా వాటి తాతముత్తాతలలో ఎవరి పోలికయినా వచ్చి ఉంటుంద''ని సమాధానమిచ్చాడు. ''అదే విధంగా నీ కొడుక్కి కూడా నీ వంశస్థుల్లోని ఎవరి రంగయినా వచ్చి ఉంటుంది'' అని దైవ పవ్రక్త (స) సెలవిచ్చారు. (ముస్లిం) హజత్ర్‌ ఆయిషా (ర) కథనం - ఒక రోజు దైవ పవ్రక్త (స) సంతోషాతిశయంతో నా దగ్గరకు వచ్చారు. ఆయన ముఖారవిందం పక్రాశిస్తూ ఉంది. నన్నుద్దేశ్యించి ఆయన ఇలా అన్నారు: ''నీకు తెలుసా! ముజజ్జిజ్‌ ముద్‌లజీ ఇప్పుడే జైద్‌ బిన్‌ హారిసా మరియు ఉసామా (ర)ను చూసి ''ఈ కాళ్ళు పరస్పరం పోలికలు గలవి'' అని అన్నారు (బుఖారీ, ముస్లిం) అంటే - ఆ సమయంలో వారిరువురి ముఖాలపై దుప్పటి ఉంది. పాదాలు మాత్రం కన్పిస్తున్నాయి. కేవలం పాదాలు చూసి ముఖ సాముద్రిక విద్యలో నిష్ణాతుడైన ముద్లిజ్‌ తెగకు చెందిన ముజజ్జిజ్‌ నిదురిస్తున్న వారిద్దరూ ఒకే వంశ వృక్షానికి చెందినవారని చెప్పడం మహా ప్రవక్త (స) వారికి ఎంతో ఆనందాన్ని కలిగించింది. ఎందుకంటే అప్పటికే ఉసామా బిన్‌ జైద్‌ (ర) నలుపు రంగుపై కొంత మంది చెవులు కోసుకుంటున్నారు. ఉసామా గారి తండ్రి జైద్‌ బిన్‌ హారిసా (ర) తెల్లగా ఉండటం వారి సంశయానికి అసలు కారణం. ప్రస్తుతం రక్త పరీక్ష వల్ల ఈ పని సులువైపోయినప్పటికీ ఆ సౌకర్యం లేని, దాని గురించి తెలియని ప్రదేశాల్లో నివసించే ప్రజలకు ఇందులో అనేక నిదర్శనాలున్నాయి. దంపతుల్లో అన్యోన్నత పెరగాలంటే 1) పెళ్లికి ముందు దాంపత్య జీవితం గురించి ఎన్నో కలలు కంటాం. ఇతరుల అనుభవాల ఆధారంగా ఏదేదో ఊహించుకుంటాం. దాంతో పెళ్లయ్యాక వాస్తవం ఊహకు ఏ కాస్త దగ్గరగా లేకపోయినా అసంతృప్తికి లోనవుతాం. 2) తక్కువ సమయంలో ఎక్కువ తెలుసుకోవాలనే తత్వం దాంపత్య జీవితంలో పనికి రాదు. ఒకరి ఇష్టాలు మరొకరు తెలుసుకుని మసలుకోవటానికి, ఒకరి అభిరుచులు మరొకరికి అర్థం అవ్వడానికి సమయం పడుతుంది. ఇదంతా నెమ్మదిగా జరిగే చర్య. 3) యాంత్రికంగా మసలుకోకుండా ఎదుటి వ్యక్తి సంతృప్తే ప్రధానంగా మసలుకోగలిగితే దంపతులిద్దరూ సమంగా దాంపత్య జీవితాన్ని ఆస్వాదించగలుగుతారు. ఒకరి ఆనందం మీద మరొకరు దృష్టి పెడితే మనసులోని అర్థం లేని భయాలు పటాపంచలవుతాయి. ఆత్మవిశ్వాసంతో మెలగగలుగుతారు. ఫలితంగా మీ ప్రతి చర్యా జీవిత భాగస్వామి ఆనందాన్ని రెట్టింపు చేస్తుంది. 4) ఇప్పుడు కొత్తగా పెళ్లిళ్లు అవుతున్న వారిలో పెద్ద చదువులు, ఉద్యోగాలు చేస్తున్నవారే ఎక్కువ ఉంటున్నారని ఓ అధ్యయనంలో వెల్లడైంది. ఈ నేపథ్యంలో ఇరువురికి ఆత్మభిమానం కాస్త ఎక్కువగా ఉండొచ్చు. అయినా భాగస్వామి పట్ల ఈగోలు పక్కనపెట్టాలి. దాంతో భాగస్వామి మనసులో స్థానం సంపాదించగలుగుతాం. 5) పనిచేస్తేనే ఇల్లు గడిచే పరిస్థితులు ఇప్పుడున్నాయి. అయినా ఉన్న తక్కువ సమయంలోనైనా భార్యాభర్తలు ఒకరికోసం మరొకరు సమయాన్ని తప్పకుండా కేటాయించాలి. అప్పుడు వారి బంధం మీద నమ్మకం ఏర్పడుతుంది. నా కోసమంటూ ఓ వ్యక్తి ఉన్నారన్న భావన ఇరువురిలోనూ కలుగుతుంది. 6) ఒకరిని మరొకరు అర్థం చేసుకోవడంలో పొరపాట్లు జరుగుతాయి. అంత మాత్రాన ఆవేశంలో నిర్ణయాలు తీసుకోకూడదు. అవి గొడవలుకు దారి తీస్తాయి. భార్యాభర్తల్లో ఎవరో ఒకరు కోపంతో అరుస్తున్నా... మరొకరు సైలెంట్‌గా ఉండటం చాలా మంచిది. ఆ సమయంలో ఏం మాట్లాడినా కోపంగా ఉన్న వ్యక్తి మరింత రెచ్చగొట్టినట్లే అవుతుంది. కొంత సమయం తీసుకుని, ప్రశాంతంగా ఉన్నప్పుడు ఆ విషయం గురించి మాట్లాడితే మంచిది. ఒక వేళ తప్పుగాని, పొరపాటుగాని జరిగి ఉంటే క్షమించమని అడగటంలో తప్పేమి లేదు. అలా కాదని తగ్గేదే లే అంటే మాత్రం తిప్పలు తప్పవు. 7) పెళ్లైన కొత్తలో దంపతుల మధ్య రహస్యాలు ఉండకూడదని గతంలో జరిగిన ప్రేమ వ్యవహరాలు చెప్పుకున్నా. వాటిని అక్కడితోనే మర్చిపోవాలి. వాటిని మనసులో ఉంచుకుని ప్రతి చిన్న విషయాన్ని అనుమానించకూడదు. అదే విధంగా అనుమానం వచ్చేలా ప్రవర్తించకూడదు. 8) ఎదుటి వ్యక్తి మీద ప్రేమని చూపించడంలో చిన్న చిన్న కానుకలు ఇస్తూ ఉండాలి. లేదా వారి మీద కవితలు లేదా లేఖలు రాయడం, పాటలు పాడటం చేయాలి. నచ్చిన కలర్‌తో దుస్తులు ధరించడం చేస్తూ ఉంటే భాగస్వామికి మరింత దగ్గరయ్యి భార్యభర్తల బంధం బలపడుతుంది. 9) దాంపత్యజీవితంపై ఎన్నో కలలు కంటుంటారు. తమ జీవితం అలా ఉండాలని ఇలా కావాలని ఆశ పడుతుంటారు. కానీ ఆ దిశగా అడుగులు మాత్రం వేయరు. అందరు చేసే తప్పులే చేస్తూ సంసారాన్ని కకావికలం చేసుకుంటారు. సముద్రాన్ని అయినా ఈదొచ్చు కానీ సంసారం మాత్రం ఈదడం అంత సులువు కాదని తెలుస్తోంది. దాంపత్యం సవ్యంగా సాగాలంటే ఇద్దరి మధ్య ఉండాల్సింది అనురాగం, ఆప్యాయత, అభిమానం. వీటిని ఎప్పుడు కూడా దూరం చేసుకోకూడదు. 10) పరస్పర గౌరవం: వివాహం జీవితంలో భార్యభర్తలు పరస్పర గౌరవంతో నడుచుకోవాలి. ఒకరి ఆలోచనలు, భావాలు, అభిప్రాయాలను మరొకరు గౌరవించాలి. పరస్పర ప్రశంసలు, అవగాహనను కలిగి ఉండాలి. ఇవే వైవాహిక జీవితాన్ని సంతోషకరంగా చేయగలవు.